Pigdugangan kan National Food Authority (NFA) an proseso kan quality checking mga bagas gikan sa saindang mga buffer stock antes paman ini ipabakal sa publiko sa paagi kan mga Kadiwa stores.
Sa sarong pulong balitaan, pigkumpirmar ni NFA Administrator Dr. Larry Lacson na karaniwang ginagamit na quality control kan saindang ahensya an kun apodon inherit system kun saen kada bulan, makua sinda nin samples gikan sa mga bagas na iyong subject for laboratory analysis asin organaliptic asssessment tanganing maaraman kun pasado for human consumption an mga bagas.
Sa presente, pigdugangan ninda an bagong proseso kan quality assessment sa mga P20 rice kaya magikan sa karaniwang proseso na ini, maagi pa ini sa sarong bag-to-bag checking antes ini dagusang i-release sa Food Terminal Inc. (FTI) na iyo mang nakatoka na magpabakal kan mga bagas.
An nasambitan ng dugang na proseso an katakod sa naging mahigot na kasugoan ni Agriculture Secretary Francisco Tiu Laurel Jr. asin sarong mahiot na direktiba gikan ki Presidente Ferdinand Marcos Jr. na dapat i-double check asin siertohon na marhay an mga kalidad kan bagas na ipapabakal sa irarom kan programa.
Sa ibong kaini, pigtawan-duon man kan Administrator na dawa pa pirang layers an gibuhon para sa quality control kan mga bagas, dae man ini maluwas na 100% na perpekto asin magkakaigwa pa man nin pirang problema sa kalidad kaini.
