Pigkumpirmar kan Sugar Regulatory Administration (SRA) an enot na kaso kan sugarcane infestation sa Negros Occidental, huli sa red-striped soft scale insects (RSSI).
Naaraman kan SRA an presensya kan mga ini sa anom na lugar sa Northern NegOr. Ini an enot na kumpirmadong pest infestation sa nasambitan ng probinsya na pigkokonsiderar komo sugar bowl kan nasyon huli ta naggikan digdi an haros 70% kan annual production ka asukar sa Pilipinas, basado naman sa datus ka ahensiya.
Nagbilog na man an SRA nin sarong task force na pinangengenotan ni SRA board member David Andrew Sanson para magsagibo nin control operations asin mapugolan an paghewas kan problema, sa tabang kan iba pang ahensiya kan gobierno.
Saro sa mga inisyal na plano kan task force an makakua nin quarantine measure gikan sa Department of Agriculture. Basado sa pag-aadal kan University of the Philippines (UP), igwa nin kakayanan an nasambitan ng peste na pabagsakon an sugar content kan mga tubo nin hasta 50%, dalan tanganing magkawsa nin labi na production loss kun napabayaan.
Enot na nagkaigwa nin siring na infestation sa probinsya kan Pampanga kan 2022.
Sigun ki SRA administrator Pablo Luis Azcona, pinagsususpetsahang naggikan an nasambitan ng peste sa Luzon, kaya pinag-iingat kaini an mga magtutubo na magin maingat sa pagbakal kan mga cane points o mga punlang tubo.
Hasta sa presente kaya soboot nagtitinir pa man an huma kan RSSI sa Luzon, kaya marhay na iuntok muna an pagbibiyahe kan mga planting materials gikan Luzon asin iba pang lugar na enot na natukoy na apektado kan nasambitan ng peste tanganing mapugolan an orog pang paglakop kan nasambitan ng helang.
