NAGA CITY- Pigseselebrar ngunyan na aldaw sa siyudad nin Naga an ika-67 na Birth Anniversary ni Jesse Robredo.
Sa entrevista kan Bombo Radyo Naga ki Mark Anthony Glorioso, Shrine Curator II, sinaysay kaini na ngunyan na aldaw liwat na pigrurumdom an pagkamundag, legasiya komo ama kan mga Nagueño, serbidor kan siyudad komo Alkalde, asin Secretary kan Department of the Interior and Local Government ni Jesse.
Sigun ki Glorioso, liwat giraray ipinapahiling sa aldaw na ini an mga nagiribuhan ni Jesse orog na an pagbusol sa marhay na paggogobernar asin an tsinelas leadership.
Si Jesse nagserbe komo alkalde kan siyudad nin Naga kun saen pinuonan kaini an inaapod na transformative leadership sa paagi kan transparency, citizen participation, asin inklusibong pag-uswag na rason tanganing makareseber ini nin mga rekognasyon para sa saiyang inobasyon sa paggogobernar.
Apwera digde, si Jesse an nagserbe man komo DILG Secretary kun saen ipinahiling kaini an inaapod na accountability, local empowerment, asin ethical leadership na nagmarka nin magayon na legasiya sa public service sa nasyon.
Katakod digde, nagkundusir man nin Wreath-Laying Ceremony, Banal na Misa asin an ika-apat na Jesse Robredo Memorial Chess Tournament tanganing ma-inspire an mga jovenes na padagos na manindugan para sa tama.
Sa ngunyan, pig-enkaminar na sana ni Glorioso an mga Nagueño na padagos na rumdumon an legasiya na winalat ni Jesse orog na an pagbusol sa good governance na iyong pusog na pundasyon kan nasyon para sa pag-uswag.
