NAGA CITY- Kasado na ang preparasyon kan LGU-Naga para sa ikukundusir na National Youth Day na mapuon sa aga, June 10, 2025.
Sa entrevista kan Bombo Radyo Naga ki Allen Reodanga, pamayo kan CEPPIO Naga, sinaysay kaini na igwa nang binilog na incident management team, emergency operation center, logistics, traffic, public information asin solid waste management team an siyudad na iyong mamanehar sa nasambitan ng aktibidad.
Sigun ki Reodanga, mapakol sa 1,100 na personahe an saindang ipapakuriyat sa bilog na Naga City kun saen kinababalihan ini kan Naga City Police Office, City Disaster Risk Reduction Management Office, Public Safety Office, Barangay tanod, volunteers, health cluster kaibahan an red cross siringman mga doktor asin nurses.
An nasambitan ng mga grupo an masierto sa kasalbaduhan kan ribong mga delegado na mapartisipar sa limang aldaw na National Youth Day.
Katakod digde, makanselar man nin klase sa June 11 sa gabos na lebel sa siyudad nin Naga para sa ikukundusir na Traslacion na bukas man sa publiko.
Apwera digde sa maabot man na Biyernes hasta alas 3 sana nin hapon an laog kan mga estudyante magin an yaon sa gobierno.
Obheto soboot kaini na mabawasan an volume kan mga lunadan na malaog sa Naga City mantang pigsasagibo pa an aktibidad.
Sa ngunyan hagad na sana kaini an kooperasyon kan publiko para sa pagkundusir kan National Youth Day.
