NAGA CITY – Ikinaogma kan sarong kapitan sa syudad nin Naga an panunumpa ni Naga City Mayor-elect Leni Robredo. Sa entrevista kan Bombo Radyo Naga ki Jerrold Rito, Barangay Kapitan kan Concepcion Grande kan nasambitan ng siyudad, sinaysay kaini na excited soboot sinda sa pagtukaw ni Robredo komo bagong elehidong alkalde kan siyudad.
Dugang pa kaini, naglalaom man sinda mas matutok an opisyal sa siyudad sa pagsasagibo nin programa asin sa pag-implementar kaini.
Katakod kaini, imbitado man an saindang konseho sa oath-taking ni Robredo kun saen ini man an saindang pagpapahiling nin suporta sa paglaog kaini sa Naga City.
Sigun pa ki Rito, sa kadakol na mga magagayon na programang naisagibo sa siyudad, naglalaom ini na mas magin marhay pa asin mas mapagayon pa ini partikularmente na sa sektor kan edukasyon, siring na sana kan pagtatao nin mga schoolarship grant education na mas orog pang kadakol an matawan kaini.
Siring man sa lado kan health and nutrition na lugod mas madugangan pa an mga serbisyong pigtatangro kan Naga City General Hospital, magin man pag-abot soboot sa pag-manehar kan trapiko sa paagi kan road widening asin man an pag-abot sa mga emergency response lugod na maipadagos huli man ta dakula soboot ining katabangan sa mga nangangaipuhan.
Pigtawan-duon pa kan opisyal, na sa pagtukaw ni Robredo sana mas pakusugon pa an an pag-abot sa disaster response asin ma-train pa an gabos na mga personnel siring man dapat soboot an mga barangay igwang mga kagamitan na marekas na makakatabang sa pag-responde sa oras kan kalamidad.
Sa ngunyan, kahagadan na sana ni Rito sa gabos komo kapitan, na pirming magkasararo asin magsuporta sa pagtukaw kan bagong elehir na alkalde kan siyudad para sa mas marekas na pag-asenso na iyo man an saro sa mga obheto kan kadakol na tawo.
