Pigsisierto kan Department of Trade and Industry (DTI) an pagbabantay sa presyo asin supply kan mga basic goods ngunyan na panahon kan tag-uran asin mga kalamidad.
Sigun ki DTI Sec. Cristina Roque, puon kan pigdeklarar kan state weather bureau an paglaog kan rainy season, pigbabantayan na kan ahensiya an supply kan mga basic goods na pwedeng maapektaran sa serye kan mga pag-uran.
Kaipuhan masierto soboot na akma pa man an presyo kan mga ini asin dae gamiton kan mga negosyante an serye kan pag-uran komo rason tanganing maglangkaw kan presyo.
Kasabay man kan piglalaomang paglaog kan mga bagyo sa nasyon, matinir soboot an DTI na masubaybay sa mga basic goods na ipapabakal sa mga merkado.
Primerong susubaybayan an mga lugar na posibleng ideklarar sa irarom kan state of calamity huli sa makukusog na bagyo asin iba pang kalamidad.
Enot nang pigkumpirmar kan sekretaryo na mayong paglangkaw sa presyo kan mga primerong barakalon sa presente, sa ibong kan magkakasunod na bigtime oil price hike.
Magin an mga delata an dae man naglangkaw nin presyo sa ibong kan naenot na kahagadan kan mga manufacturer.
