NAGA CITY- Padagos na pigmamantinir sa Barangay Tabuco sa siyudad nin Naga an kalinigan sa mga drainages asin an tamang pagkolektar nin basura.
Sa entrevista kan Bombo Radyo Naga ki Elisa Carmona, Barangay Kapitan kan Barangay Tabuco, sinaysay kaini na an nasambitan ng lakdang an komo preparasyon sa epekto kan naeeksperyensiyahan na tag-uran.
Sigun sa opisyal, kan nakalihis na huring semana kan June, nagpalinig soboot sinda nin drainage, mga manhole sa tabang kan TUPAD workers tanganing mahali an mga nakabarang basura.
Katakod digde, pigsaysay ni Carmona na importante na mamantinir an kalinigan sa mga drainage system tanganing deri-deritso an daloy kan tubig orog na ngunyan na naeeksperyensiyahan an pag-uuran asin malikayan an pagbaha.
Sa ibong na lado, dakula man an pasasalamat kan Kapitan sa Solid Waste Management Office Naga huli ta pirme soboot nakokolektar an saindang mga basura, sa paagi kaini nalilikayan an pagkuriyat kan mga basura sa manlaen-laen na areas sa saindang lugar na delikado tuyong tag-uran.
Mientrastanto, enkaso man na igwa pang tadang basura, ginagamit soboot ninda an itinaong dump truck tanganing hakuton ini asin ihatod sa Sanitary Landfill.
Sa ngunyan, hagad na sana ni Carmona an pakikisumaro kan saindang mga residentes para sa ikakarahay asin pagmantinir nin kalinigan sa saindang barangay.
