Tutol si Senador Juan Miguel Zubiri sa online gambling sa nasyon asin pig-apod kaining “silent epidemic” o tuninong na salot na padiit-diit na nagraraot sa mga Pilipino.
Sa pagpupuon kan 20th Congress, nagsunad si Zubiri kan propwestong ley na obhetong ipagbawal an online gambling o an “Anti-Online Gambling Act of 2025.”
Ipinagbabawal kan propwestong ley an gabos nin klase kan online gambling sa nasyon asin bako sanang simpleng regulasyon. Kabali digdi an mga digital betting platform, mobile application, asin mga website na nagtataon-dalan sa mga naggasgamit na makapagtaya gamit an cellphone, tablet, o computer.
Saklaw kan propwesto an parehong lokal asin offshore-operated gambling sites na nagtatarget o naglilingkod sa mga Pilipinong naggagamit. Ipinagbabawal man an mga digital wallet asin mga payment service providers siring kan credit cards, GCash, PayMaya, asin iba pa na nagtabang o magproseso kan anumang transaksyong may kinaaraman sa online gambling.
Anuman na pagtabang sa pagtaya, sa pagpapalakop kan nilalaog dapit sa sugal, o sa pag-aanunsyar kan mga betting site — magin sa tradisyunal na media, social media, o sa pagamit k an influencer marketing — an mapapanimbag.
An mga mabalgar sa propwestong ley an mahahampang sa magagabat na padusa. Sa enot na pagbalgar, ipapataw an multang dae mababa sa ₱20 milyon asin anom na bulang suspensyon kan lisensya.
Sa ikaduwang pagbalgar, posibleng mag-abot sa ₱50 milyon an multa asin sarong taong suspensyon kan operasyon. Sa ikatolong pagbalgar, ipapataw an multang dae mababa sa ₱100 milyon, permanenteng pagbawi kan lisensya, asin paglilitis sa mga pangenot na opisyal kan kumpanya, na posibleng maghantong sa anom na taong pagkakakulong.
