Pigtawan-duon kan presidente kan Brazil na dapat maghiro an bilog na kinaban tanganing pugolan an saiyang pigladawan komo “genocide” kan Israel sa Gaza, mantang nagtipon an mga lider gikan sa 11 nasyong kasapi kan BRICS sa Rio de Janeiro kan Dominggo.
Sinaysay ni Luiz Inacio Lula da Silva sa hampang kan mga lider gikan sa China, India, asin iba pang mga nasyon, na dae sindang pwedeng magtinir nin mayong pakiaram sa genocide na pigsasagibo kan Israel sa Gaza — kun saen mayong pigpipiling paggadan sa mga inosenteng sibilyan, asin paggamit nin kagutuman komo sandata kan giyera.
Pigpahayag ni Lula an saiyang mga komento mantang liwat nagpuon an usaping untok-putukan sa Doha sa pag-ultanan kan Israel asin Hamas, sa tahaw kan nagkukusog na pangapodan na wakasan na an 22-bulang giyera na nagpuon makalihis an pag-atake kan Hamas kan Oktubre 7, 2023.
Sinaysay ni Lula kan Dominggo na mayo nin anuman na makatarungang dahilan para sa mga teroristang aksyon kan Hamas kan aldaw na idto—na nagresulta sa pagkagadan kan 1,219 katawo, kadaklan an mga sibilyang Israeli.
Siringman, maduon man kaining pigkondenar an mga nagsunod na lakdang kan Israel, na pigtuligsa kaini komo labi asin bakong makatawo.
Kaiba sa pagtiripon kan BRICS an mga nasyon siring kan Iran, na pigkokonsiderar na matinding kaiwal kan Israel, alagad pati naman an mga nasyon siring kan Russia, na may haraning ugnayan sa Israel.
