Plano kan legal counsel ni dating Presidente Rodrigo Duterte na gamiton an resulta kan Senate committee hearing na dating pinangenotan ni Sen. Imee Marcos.
Ini an tanganing tawan-duon na an nagin pag-arestar sa dating Presidente hasta sa dagusang pagdara sa saiya sa Netherlands an bakong makatarungan.
Sigun ki Nicholas Kauffman, an finding kan nasambitan ng comittee an nagpapahiling na an pag-arestar sa dating Presidente an huli sa political motive.
Pigpapahiling soboot kaini na an nagin operasyon an sarong ‘whole-of-government’ effort tanganing padapaon an mga Duterte.
Liwat pigtawan-duon kan abogado na an pag-arestar asin pagdara sa dating Presidente sa The Hague an sarong klase kan kidnapping, bagay na nagluwas man soboot sa Senate investigation na pinangenotan kan presidential sister.
Enot nang pig-rason ni International Criminal Court (ICC) Deputy Prosecutor Mame Mandiaye Niang na kun pighuhurot kan kampo kan dating Presidente na iyo ini an ‘na-kidnap’ kan dinara sa ICC, mas importanteng magtinir ini sa kustodiya kan nasambitan ng tribunal.
Rason man kan prosecutor, dae pipilion kan sarong biktima kan kidnapping na liwat magbweltada sa kustodiya kan mga nangidnap sa saiya kun matawan ini nin tyansa na makatakas.
Siring man, pigtawan-duon ni Kaufmann na an saiyang claim na mapadapit sa kidnapping an nakabase sana sa committee report na pigluwas ni Sen. Marcos, kasunod kan nagkapirang serye kan imbestigasyon.
Pighalimbawa man kan abogado an conclusion kan nasambitan ng report kun saen pigpapakasugan kan senador sa Office of the Ombudsman an nagkapirang haralangkaw na opisyal kan gobyerno na soboot igwang kinaaraman sa nangyarong pag-arestar.
