Aram baya nindo mga ka-bombo, sarong 37-anyos na babae gikan sa Jilin, China, an nagin viral makalihis na akuon kaini na dae pighahali an saiyang makeup sa laog nin haros duwang dekada na nagkawsa man nin malalalang rashes sa saiyang lalawgon.
Susog sa report, an babae an pigbisto na si Gao, kun saen pigheras kaini an saiyang istorya sa social media tannganing magserbeng pagirumdom sa iba na linigan nin marhay an saindang mga lalawgon makalihis na maglaag nin makeup.
Sigun kaya sa babae, bigo soboot ini na linigan nin marhay an saiyang lalawgon sa laog nin 22 na taon na nagresulta sa seryosong allergy na nagwalat nin pulang marka sa saiyang lalawgon.
Dugag pa kaini, 15-anyos pa sana soboot nagpuon na ining maglaag nin makeup sa lalawgon gamit an lipstick kan saiyang Ina asin puon kaidto nagin habit na soboot kan babae na ipasipara an paglinig nin marhay sa saiyang lalawgon makalihis na mag-apply nin makeup.
Mientrastanto, an kaso kan babae an nakaguno nin manlaen-laen na opinyon asin nagin sentro kan debate sa China orog na ta pig-akusaran kan iba na ginagamit kaini an saiyang kondisyon tanganing magdugang pa an saiyang viewers sa social media.
Sa ngunyan, nagpagirumdom man an mga doktor na pirmeng isabuhay an tamang pangangataman sa sadiri tanganing malikayan an mga darakulang problema sa maabot na panahon.
