NAGA CITY- Tututukan kan LGU-Minalabac an disaster preparedness kan lambang barangay kan saindang banwaan ngunyan na panahon kan tag-uran.
Sa entrevista kan Bombo Radyo Naga ki Mayor James Lizardo kan LGU-Minalabac, sinaysay kaini na nakipag-ulay na soboot ini sa pamayo asin employee kan Disaster Risk Reduction and Management Office tanganing magbilog nin plano antes na igwang maeksperyensiyahan na kalamidad.
Sigun ki Lizardo an saindang banwaan an binabaha tuyong igwang kalamidad, ini nin huli ta napapalibutan sinda nin salog siring kan Bicol River asin iba pang water forms na enkaso mag-apaw nagpapasiring an tubig sa saindang lugar.
Huli kaini, kaipuhan na tutukan an kapreparaduhan kan saindang mga barangay tanganing masierto na magigin salbado an gabos.
Dugang pa kan opisyal, plano man ninda na ibalyo sa Barangay an mga first aid team o nagkapirang mga rescue vehicle tanganig magamit tolos kan iba sa panahon kan emerhensiya.
Apwera digde, dudugangan man ninda an mga baroto na dakulang katabangan sa rescue effort tuyong igwang kalamidad na nagbungkaras
Sa ngunyan, pigsierto na sana kan alkalde na yaon an saindang 100% dedikasyon tanganing magtinir na salbado an saiyang mga nasasakupan sa panahon kan katibaadan.
