Pighayag kan Department of Justice na saindang padagos na pig-aadalan an nagkapira pang mga impormasyon na nagkokonektar sa pagkawara kan mga sabungero sa naganap na ‘war on drugs’.
Sigun mismo ki Justice Secretary Jesus Crispin Remulla, presente nindang pinag-aadalan an mga detalyes na nakalap mapadapit sa koneksiyon kan drug war.
Alagad maski enot na kaining pig-ako asin pigheras an pagkakakonektar kan duwa, saiyang pighurot na kinakaipuhan pa nindang imbestigaran ini nin marhay.
Sa ibong soboot kan natuklasang pig-aapod na ‘intersection’ sa tahaw kan duwang isyu, saindang pinag-aadalan na man an naganap kan nakalihis na taon apwera pa sa pagkawara kan mga sabungero.
Huli man kaini, marurumdoman na kan nakalihis sana, saiyang pigbuyagyag an duwang naarestar ma indibidwal sa Meycauayan, Bulacan na imbwelto sa ilegal na droga.Kun saen pigkokonektar an kaso kaini sa isyu kan pagkawara kan mga sabungero na konektado sa e-sabong.
Nagtutubod kaya an nasambitan ng sekretaryo na magin an pig-aapod na ‘death squad’ kan kasagsagan kan drug wag an kaparehong grupo man na iyong nasa likod kan mga biglaang pagkawara.
Dugang pa ni Justice Secretary Remulla, basado sa imbestigasyon, imbwelto man soboot digde an nagkapirang opisyal na saiya man dae pigpangaranan o maski iladawan.
Kaya huli digde, pagsisierto ni Justice Secretary Remulla na saindang dae pigpapabayaan an imbestigasyon dapit sa pagkawara kan mga sabungero.
Orog na ta bako na sana soboot ini mapadapit sa 34 biktima kundi pati na man an nagkapirang mga posibleng biktima kan ‘disappearances’ sa mga nakalihis na taon.
Alagad saiyang sinaysay na ini dae pwedeng madalion huli man ta igwang sistematikong paagi kan pag-iimbestigar an saindang pigsusunod mapadapit sa pigsasagibong ‘case buildup’ kan ahensiya.
