Pigtawan duon kan Kataastaasang Hukuman na dae pa man absuelto an Bise Presidente kan nasyon na si Vice President Sara Duterte gikan sa kinakaatubang nin mga reklamo.
Ini an kasunod kan ideklarar kan Korte Suprema na ‘unconstitutional’ an pigsunad na ‘articles of impeachment’ kan House of Representatives kontra sa saiya.
Sigun ki Supreme Court Spokesperson Atty. Camille Sue Mae Ting, an deklarasyong ini an dae nangangahulugan nin pag-absuelto sa Bise Presidente sa saiyang kinakaimbweltuhang mga akusasyon.
Sa ibong kaini pigheras man kaining pwede pang magsunad nin panibagong ‘impeachment complaint’ kontra sa akusadong opisyal alagad ini an sa masunod na taon pa nin 2026.
Nag-ugat kaya an deklarasyong inisyu kan Korte Suprema makalihis mahilingan nin pagbalgar sa pigsusunod na ‘1 year rule’ asin bigong pagbisto sa karapatang magkaigwa nin due process na nakasaa sa Bill of Rights nin konstitusyon.
Mantang saiya man na nilinaw na pwede pang magsunad nin mosyon an lado kan kamara tangani maiparekunsidera sa Supreme Court an iniluwas kaining resolusyon.
Dugang pa digde, pigheras kan nasambitan ng tagapagtaram an desisyong isinurat ni Senior Associate Justice Marvic M.V.F. Leonen kun saen nakabugtak digde an tungkulin kan Korte Suprema na maipautob an kun ano an naayon sa ley.
Bagaman sarong ‘political process’ an pagsasagibo nin ‘impeachment proceeding’, dae pa man ini nangangahulugang maikokonsiderar na ‘political proceeding’ sana.
Marurumduman sa isinagibong sesyon kan Supreme En Banc kan suudma na nagkasararo an mahistrado sa saindang pagboto pabor sa deklarasyong ini.
Kaya man an articles of impeachment na ipinasa kan mababang kapulungan kan Kongreso sa Senado an ipinawarang bisa kan Korte Suprema komo ‘unconstitutional’ asin ‘null and void’.
