Pig-anunsyar ni Canadian Prime Minister Mark Carney kan nakalihis na Huwebes (aldaw sa Pilipinas) na plano na kan Canada na bistuhon an Estado kan Palestine sa maabot na United Nations General Assembly sa Setyembre, 2025, kasunod kan naglalalang gutom asin krisis sa Gaza.
An desisyong ini an kasunod kan kaparehas na lakdang gikan sa France asin Britain, na parehong nagpahayag nin intensiyon na bistuhon an Palestine kun dae mauntok an Israel sa bakbakan sa Gaza.
Sigun ki Carney, an padagos na kagutoman asin danyos sa Gaza an nagapahiling soboot nin padikit-dikit na pagkawara kan posibilidad kan pagkakaigwa nin sarong malayang estado para sa mga Palestinian.
Binatikos man kaini an gobyerno kan Israel sa pagpapabaya sa naglalalang krisis sa Gaza. Sinaysay man ni Carney na an desisyon kan Canada an nakabase sa promesang reporma kan Palestinian Authority, kaibahan an planong eleksiyon sa 2026 kun saen dae pwedeng magpartisipar an Hamas.
Mientrastanto, maduon ining tinutolan kan Israel asin kan Estados Unidos. Sigun sa Israeli Foreign Ministry, ini an mapahiling sana nin pagsuporta sa terorismong piggibo kan grupo kan Hamas asin hadlang sa paghihingowa na maabot an untok-putukan.
Inutro ni US President Donald Trump an pagtutol sa pagbisto, asin inapod ining salang lakdang na nagtatao nin gantimpala sa mga terorista.
Basado man sa datos kan Gaza health ministry, nag-abot na sa 154 an binawian nin buhay huli sa gutom asin malnutrisyon na kadaklan iyo an mga kaakian.
Kan nakalihis na Miyerkules (aldaw sa Gaza), pigreport an pagkagadan kan sarong 2-anyos na aking babae huli sa kakulangan kan gatas oara sa saiyang kondisyon.
Alagad maski ipighayag kan Israel an paramientras na pag-untok – an opensiba sa nagkapirang parte kan Gaza tanganing makalaog an mga ayuda, sinaysay kan United Nations na an numero kan pagkakang nakakaabot an dae pa man giraray bastante.
Marurumduman na an giyera sa Israel an nagpuon kan nakalihis na Oktubre 7, 2023 makalihis an ag-atake kan Hamas sa timog Israel kun saen 1,200 an binawian nin buhay asin 251 an dinukot, sigun sa Israel.
Puon kaidto, labi 60,000 na an binawian nin buhay sa Gaza sigun sa local health ministry kan Gaza.
