Pig-ako kan negosyanteng si Atong Ang an pormal na pagsusunad kan mga kaso kontra sa saiya katakod sa soboot pagkaka-imbwelto kaini sa kaso kan missing sabungeros.
Ini an kasunod kan pagsusunad kan mga pamilya kan missing sabungeros in multiple counts of murder asin serious illegal detention charges kontra ki Ang asin saiyang mga kaibahan kan nakalihis na Sabado, Agosto 1.
Sa sarong statement na pigluwas sa paagi kan saiyang abogado na si Atty. Gabriel Villareal, sinaysay ni Ang na nakapreparar ining simbagan an alegasyong piggagapo kontra sa saiya sa angkop na legal forum.
Nanindugan man si Ang na inosente ini asin nagpatanid kontra sa testimonya kan self-proclaimed whistleblower na si Julie Patidongan alyas Totoy na saiyang pigladawan na igwang depekto, pansadiring interes asin mayong katibayan.
Nagibo soboot ni Patidongan na mag-level up gikan sa pagigin parte kan robbery syndicate pasiring sa pagpapadalagan kan saiyang criminal network siring kan ilegal na sugal, kidnapping, pangingikil, asin pananakot, gamit an resources asin saiyang mga koneksiyon kan dae naaaraman kan saiyang mga superior.
Sinaysay pa ni Ang na kan madawit si Patindogan sa pagkawara kan sarong kalabang sa sabong sa Manila kan nakalihis na huring parte kan nakalihis na taon, natakot ining mabunyag an saiyang mga kasalan.
Kaya ngunyan, pigtutukdo kaini an saiyang mga superior komo mga utak soboot sa sarong istoryang gibo-gibo sana ni Alyas Totoy tanganing takasan an kapadusahan sa saiyang mga krimen.
Sinaysay man ni Ang na nalinlang an publiko kan sarong “lobo na nagtatago komo tupa” asin pighurot na sarong bihasang manlilinlang si Patidongan na nakikiina sa mga biktima kan trahedyang ini man mismo an may kagibo.
Pig-apod man ni Ang na kathang-isip sana an istorya ni Patidongan asin dapat ini an mabunyag asin harani na soboot ining mangyari.
Marurumduman, naenot ng pigtukdo ni Patidongan sinda Ang asin aktrez na si Gretchen Barreto na nasa likod soboot kan pagkawara kam mga sabungero, bagay na pinahimutikan man nindang duwa.
