Pig-enkaminar kan malakanyang an mga lokal na gobyerno na makisumaro sa pangapodan kan Presidente na magtabang asin ireport sa saiya an mga flood control projects sa saindang kaniya-kaniyang mga nasasakupan asin sisay an mga contractor magin ano an status kan mga proyektong ini.
Ini an kasunod kan ginibong lakdang ni Pasig City Mayor Vico Sottro na nagluwas nin report dapit sa mga flood control project sa saiyang lugar.
Sinaysay ni palace press officer asin PCO USec Atty. Claire Castro na an siring na pagtatarabangan an importante alinsunod sa naenot nang kasugoan kan Presidente na dapat tawan nin dugang na atensiyon an pagpapakarhay sa mga proyekto.
Sigun ki Castro sa nagkapirang obserbasyon, napag-araman na igwang mga dating contractor na blacklisted na alagad nagribay sana nin pangaran asin padagos pa man na nakapag-traksaksiyon hasta ngunyan.
Liwat pigtawan-duon ni Castro an naenot nang pahayag kan Presidente na nagsaysay na uusigon kan gobyerno asin kan ley an sisay man na nasa likod kan maanomalyang flood control projects.
Ini an maski pa tamaan an mga kontratista o sisay man na mga personalidad na harani sa saiyang puso enkaso mapatotoohan na igwang kinaaraman sinda sa katiwalian o maanomalyang proyekto.
