Pigpahayag ni Pasig City Mayor Vico Sotto an saiyang pagkahadit makalihis na matukoy an nagkapirang kumpanya na pag-sasadiri kan pamilya Discaya komo mga nangengenot na kontratista sa mga flood control projects sa nasyon.
Sa sarong pulong balitaan kan nakalihis na Lunes, Agosto 11, pigheras ni Presidente Ferdinand Marcos Jr. an report gikan sa Department of Public Works and Highways (DPWH) na nagsasabing 20% kan P545 billion budget para sa flood control projects an napasiring sa 15 kontratista puonHulyo 2022.
Sigun pa sa Presidente, limang kontratista sa mga ini an igwang proyekto na haros sa bilog na nasyon.
Kabali sa mga ini sigun ki Mayor Sotto, an mga kumpanyang Alpha & Omega, St. Timothy, at St. Gerrard na pag-sasadiri kan pamilya Discaya, na haloy nang kalaban sa politika.
Ipinaliwanag man ni Mayor Vico kun pano soboot nag-iikot an korapsyon sa mga siring na proyekto, kabali na an pagtatao nin 1% na kantedad komo tabang tanganing magkaigwa nin magayon na imahe an mga nasa likod kaini.
Nagheras man an Alkalde nin dugang na impormasyon dapit sa iba pang kumpanya na konektado sa pamilya Discaya, kabali na an kontratang nareseber kan Elite Construction, na soboot pagsasadiri pa kan mga ini.
Napag-araman na an kontrobersyal na St. Timothy Construction, na kabali sa mga nasambit na kumpanya, an nag-withdraw man gikan sa sarong joint venture sa Commission on Elections para sa midterm elections.
Marurumduman, nanggana si Sotto kontra ki Sarah Discaya sa Pasig mayoral race kan nakalihis na Mayo.
