Pigsierto kan Department of Education (DepEd) na iinuton ninda an problema sa kakulangan nin mga silid-aralan makalihis matawan nin pinakadakulang pondo sa 2026 proposed budget.
Kun marurumdumang, nasa ₱928.52 billion gikan sa ₱6.793 trillion na propwestong pondo sa 2026 an mapapaduman sa education department.
Sigun ki DepEd Secretary Sonny Angara, malinaw an saindang obheto na magkaigwa nin salbado, bastante asin man napapanahong mga classroom para sa lambang learner sa ano man na panig kan nasyon.
Nagpasalamat man si Angara sa Department of Budget and Management (DBM) na pagbugtak ninda nin special provision sa 2026 National Expenditure Plan (NEP) na nagtatao nin pagkakataon an DepEd na makipag-partner sa iba pang ahensiya tangani pa maisakatuparan an saindang mga programa.
Sa irarom kan presenteng set-up, an DepEd an nasugo na busision an pangangaipuhan nin mga classroom, maggibo nin design asin safety standards asin saka ipoprograma an nasambitan ng pondo.
An Department of Public Works and Highways (DPWH) man an direktang nakaresiber nin pondo asin iyong nangangasiwa sa cost estimates, procurement, asin actual construction.
Huli digde, pigsierto kan DepEd na pakukusugon pa ninda an pagpaplano asin man koordinasyon sa DPWH tangani mapagkasunduan an disaster-resilient designs kan mga klasrum asin makipag-kordinar sa mga local government units, non-government organizations asin private sectors para sa saindang mga programa.
