Nairehistro sa syudad nin Quezon an nasa 7,000 kaso nin dengue ngunyan na taon o 155% na paglangkaw gikan sa mga kasong nairehistro kan mga nakalihis na taon.
Kasabay kaini, nakapagrehistro man nin 23 kabilogang numero nin mga nagadan huli sa dengue.
Sa pinakahuring bulletin kan Quezon City Epidemiology and Surveillance Division (QCESD), nairehistro an kabilogang 6,872 kaso nin dengue magpuon Enero 1 hasta Agosto 18, 2025.
Kaiba sa datos an mga delayed report asin man validated cases. Haros kabanga sa mga ini an imbwelto an mga akin na nag eedad 10 anyos pababa, sa 3,407.
Sumunod man sa pinakadakol an mga edad 11 hasta 20 anyos sa 1,957 kaso. An mga indibidwal edad 21 hasta 30 anyos man an pigbibilog sa 750 kaso, asin ma an 31-anyos pataas an nasa 758.
Marurumduman na nagpatanid an Department of Health (DOH) sa publiko sa posibleng paglobo nin mga kaso kan dengue huli sa mga pag-uran asin pagbaha.
Kan nakalihis na Sabado, pigreport kan DOH na an mga kaso kan dengue magpuon Hulyo 13 hasta 26 an bahagyang naglangkaw kumparar sa nairehistrong report, sa kabilogang 15,091 kaso.
