Liwat na mabweltada sa Pilipinas an Volleyball Star na si Leila Barros makalihis an 25 taon komo guest of honor sa finals kan FIVB Men’s Volleyball World Championship sa September 28 sa Mall of Asia Arena sa Pasay City.
Si Barros, nakua an puso kan mga Pilipinong tagahanga kan nakalihis na 2000 Grand Prix kun saen nagpahayag kan saiyang pananabik na liwat mahiling an saiyang mga fans.
Kinumpirmar man kan volleyball superstar an saiyang pag-atendir sa sarong Instagram post makalihis man ipahayg kan Philippine Volleyball Federation (PNVF) an saiyang pagbweltada kan nakalihis na Biyernes nin banggi.Inapod man ni PNVF President Ramon “Tats” Suzara an pagbweltada ni Barrios komo regalo sa milyun-milyong Filipino volleyball fans.
Si Barros man an namamayo sa Sports Committee sa Brazilian Senate asin dati nang namayo sa Environment Committee, siring man sa Women’s Caucus, asin nagserbe komo Deputy Floor Leader para sa Gobyerno.
Nakatuon an saiyang legislative agenda sa tolong importanteng parte iyo an pagprotehir sa mga kababaihan orog na sa paglaban sa kadahasan, pagpapakusog kan sports asin pag-ataman sa kapalibotan.
Si Barros man an may akda kan limang importanteng ley asin ini iyo an Anti-Stalking Law, regulasyon kan carbon market, General Sports Law, an pagbabago kan Sports Incentive Law sa permanenteng patakaran, asin an pagtalaan kan mga mapagkukuanan gikan sa National Public Security Fund tanganing labanan an kadahan kontra sa mga kababaihan.
