Nagpakol na sa 15,161 kaso nin dengue an nairehistro sa nasyon magpuon Hulyo 20 hasta Agosto 2, 2025, sigun sa Department of Health (DOH) kan nakalihis na Sabado, Agosto 23.
Sa datos kan DOH, bahagyang mas halangkaw nin 2 porsyento an numero kumparar sa 14,909 na kaso na nairehistro magpuon Hulyo 6 hasta Hulyo 19, sarong semana antes na magtama an mga bagyong Crising, Dante asin Emong.
Nagtitinir na nakaalerto an ahensya sa posibilidad kan pagdakol nin kaso orog na ta apektado pa man kan habagat asin sarong low-pressure area sa silangan kan Southern Mindanao an nasyon. Pig-inkaminar kan DOH an publiko na imantinir na malinig an palibot tangani malikayan an pamumugad kan lamok.
Ipadagos an ‘Taob, Taktak, Tuyo, at Takip’ sa mga water-holding containers. Inabisuhan man an publiko na tulos magpakonsulta kun naka-eksperyensya nin sintomas siring na sana kan duwang aldaw na kalintura, rashes, pangugulog nin lawas, mata asin kalamnan, pagkahilo, asin pagsusuka.
Nagtitinir man na bukas an Dengue Fast Lanes sa mga ospital kan DOH para sa tulos na pag responde sa mga pasyente.
