Inihayag kan Department of Justice na saindang dae igigilid an posibilidad na pakikipagtabangan sa International Criminal Police Organization o Interpol dapit sa isyu kan flood control projects.
Sigun ki Justice Secretary Jesus Crispin Remulla, makikipagtabangan man soboot sinda sa nasambitan ng organisasyon enkaso mag-usad an imbestigasyon sa pagsusunad na kan kaso.
Kun makakasuhan na soboot an mga opisyal, kontratista o mga indibidwal na na-iimbwelto sa anomalya, sunod kaini an pag-iisyu nin Hold Departure Order o travel ban.
Alagad kun nasa ibang nasyon na an mga ini, digde na malaoag an saindang koordinasyon katuwang an International Criminal Police Organization.
Kaya sinabi na duwang notisya an pwede nindang iluwas, enot iyo an blue notice asin sunod an red notice kontra sa mga indibidwal na makakasuhan sa nasyon.
Blue notice tanganing tawan sinda nin impormasyon kun haen an suspek, mantang red notice man para sa dagusang pag-arestar sa mga ini.
Sa presente, sulamenteng Immigration Lookout Bulletin Order pa sana an inisyu kan ahensiya kontra sa mga indibidwal na imbwelto sa maanomalyang proyekto.
Sa kabilogang numero ining 43, kun saen nangengenot sa listahan iyo an mag-agom na Sarah asin Pacifico Discaya.
An pamilyang Discaya an nahahampang man sa isyu dapit sa saindang mga pagsasadiri partikularmente sa soboot nasa 80 luxury cars kaini.
