Nahahampang sa panibagong patung-patong na reklamo an sinibak na alkalde kan Bamban, Tarlac na si Alice Guo o may Chinese name na Guo Hua Ping.
Ini an makalihis magsunad nin duwang magkasuhay na reklamo an National Bureau of Investigation (NBI) – Bulacan South District Office (NBI BUSDO) kontra ki Guo asin soboot saiyang pamilya huli sa palsipikasyon kan public documents katakod sa mga pagtutugdok nin negosyo asin man pagbakal nin real property sa Marilao, Bulacan.
Kaiba sa soboot pamilya ni Guo na pigsunadan nin reklamo an sinda Mier Zhang alias Shiela Leal Guo asin Lin Wen Yi, an pinagtutubudang tunay na ina ni Alice Guo, basado sa nagluwas na imbestigasyon kaidto kan Senado.
Kabali sa mga kinakahampang nindang reklamo iyo an 30 numero kan falsification of public documents para sa pagpalsipika kan Articles of Corporation, Secretary’s Certificate asin 2021 General Information Sheet kan mga korporasyon, 30 numero kan Simulation of Minimum Capital Stock sa irarom kan Anti-Dummy Law at 4 na numero kan falsification of Public Documents huli sa pamemeke nin mga aplikasyon para sa business occupancy asin building permits.
Siringman, pigsunad kina Guo an 6 na numero kan Falsification of Public Documents para sa pagpalsipika kan Deed of Sale at Documentary Stamp katakod sa pagsasadiri kan real property.
Enot digde, nagluwas sa imbestigasyon kan NBI na incorporators si Alice Guo asin iba pang miyembro kan saiyang pamilya man nagkapirang mga kompaniya na may sasarong address sa Maligaya Street, Barangay Patubig, Marilao, Bulacan.
Nagluluwas na binakal ni Alice Guo an nasambitan ng property kan nakalihis na Oktubre 5, 2010 sa kantidad na P2 million na may hewas na labi sa 4,000 squre meters.
Basado man sa naguno na documentary evidence, idineklara ninda Alice, Shiela asin Siemen an saindang sadiri komo mga Pilipino sa Articles of Incorporation kan nabanggit na mga kompaniya, na may kapot kan mayorya kan shares.
Mantang sinda Guo Jian Zhong asin Lin Wen Yi an co-incorporators sa nasambitan ng mga kompaniya.
