Nagbaba sa 2.03 milyon an numero kan mga Pilipinong mayong trabaho o negosyo kan nakalihis na Agosto kan presenteng taon, basado sa resulta kan Labor Force Survey kan Philippine Statistics Authority (PSA).
Ini an katampad kan unemployment rate na 3.9%. Boot sabihon kaini na 39 sa 1,000 indibidwal an mayong trabaho o kabuhayan kan nakalihis na Agosto.
Mas hababa ini kumparar sa 2.59 milyong Pilipinong mayong trabaho o negosyo kan nakalihis na Hulyo 2025 na igwang katampad na 5.3% unemployment rate.
Sa pulong balitaan kan nakalihis na Miyerkules, Oktubre 8, ipinaliwanag ni National Statistician asin PSA USec. Dennis Mapa na saro sa mga rason kan pagbaba kan mayong trabaho kan nakalihis na Agosto iyo an pagbweltada kan mga obrero, na paramientras na nawaran nin trabaho kan nakalihis na Hulyo huli sa serye kan bagyong nagtama sa nasyon.
Partikularmente na digde an industriya siring agrikultura, retail, trade asin construction.
Mientrastanto, inireport man kan PSA Chief na an numero kan mga indibidwal na employed na alagad naghahanap nin dugang pang trabaho o mas hababang oras sa trabaho tanganing madugangan an saindang income o underemployed an nagbaba sa 5.38 million kan nakalihis na Agosto.
Dakula man an paglangkaw kan employment rate kan nakalihis na Agosto 96.1% o katampad kan 50.10 milyong Pilipino na igwang trabaho.
Basado sa datos kan PSA, pinakadakulang nakapapag-ambag sa kabilogang employment na nasa 61.5% iyo an sa sektor kan agrikultura na nasa 20.4% asin sa industriya na nasa 18.1%.
