Nagpakol sa labi P6.19 million na kantedad kan ilegal na droga an nakumpiskar kan mga kapulisan sa sarong semana na police operations,sigun sa Police Regional Office Bicol.
Sigun ki PRO-5 Director Brig. Gen. Nestor Babagay Jr., an mga personahe kan saindang hepatura nagsagibo nin nasa 36 na anti-illegal drug operations puon Oct. 6-12, na nagresulta sa pagkakaarestrar kan nasa 44 na suspek kabali na an limang high-value individuals asin 39 na street-level pushers.
Igwang kabilugang 910.73 grams kan shabu asin 5.50 grams kan marijuana an nakumpiskar sa nasambitan ng operasyon.
Katakod digde, an pinaka-signipikanteng operasyon an nangyari sa Pili, Camarines Sur kun saen nagpakol sa 800 grams kan shabu an nakumpiskar na nagkakantedad nin nasa P5.4 million.
An ibang operasyon an nagresulta sa P525,040 na kantedad kan ilegal na droga sa Camarines Sur; P125,564 sa Albay; P56,603.20 sa Camarines Norte; P30,770 sa Naga City; P12,920 sa Sorsogon; asin P2,720 sa Catanduanes.
