Pighayag ni Atty. Richard Anthony Fadullon, prosecutor general kan National Prosecution Service na apwera sa mag-agom na Discaya ‘selective’ man soboot an nagkapirang mga testigong nagrarani sa Department of Justice.
Nagtutubod si Prosecutor General Fadullon na pira sa mga ini dae pa pigheheras an saindang bilog na mga naaaraman dapit sa flood control projects anomaly.
Kun saen an ibang testigo igwang mga pinipili kun siisay asin dawa anong mga pangaran sana an saindang idadawit na imbwelto sa isyu kan korapsyon.
Sigun ki Atty. Fadullon, an apod digdi selective memory o selective amnesia huli ta an nagkapira sa mga ini an nakalingaw bigla tuyong hinahapot na kun siisay asin hasta saen an saindang mga naaaraman.
Susog sa pighayag ni Prosecutor General Richard Anthony Fadullon na dae tolos sinda matubod sa kun anong mga ‘testimonya’ an iheheras sa sainda kan mga nagbutwa na testigo.
Maagi pa ini sa mga ebalwasyon tanganing masierto an detalye asin impormasyon enkaso maghiro asin masunad sa korte an kaso.
Ini maski pa aminado an nasambitan na opisyal na ‘lost’ soboot an gabos orog na pag-abot sa aspeto kan pag-tell all kan mga testigo na perming nababanggit.
Pakiulay man ni Atty. Fadullon sa mga testigo na sabihon asin ibuyagyag na sa ahensiya an gabos na saindang mga naaaraman manungod sa flood control projects anomaly.
Mientrastanto kun dae man mautob sa saindang pakiulay, hagad na sana ni Fadullon na dae na magtaram pa orog na kun igwang pinipili sana sa saindang ilaglag o idadawit na mga pangaran.
