NAGA CITY – Pigpuonan na an voters registration sa siyudad nin Naga asin 50-70 na registrants ngunyan na aldaw an piglalaoman na maparehistro.
Sa entrevista kan Bombo Radyo Naga ki Atty. Maico Julia Comelec Officer, sinaysay kaini na sa siyudad nin Naga hasta sa May 18, 2026 paman an registration kun kaya dae man ninda piglalaoman sa ngunyan na madagsa an mga registrants sa nasambitan ng lugar.
Katakod digde ngunyan na semana haros an registration ikukundusir muna sa laog kan opisina alagad sa sunod na semana mabisita sa primerong barangay na nakabugtak sa saindang schedule siring na sana sa October 28 sa Bagumbayan Sur, October 29, Balatas, November 5 Abella, asin November 6 Carolina.
Sa ibong kaini piglalaoman kan opisyal na an mga barangay na dakol nin registrants iyo an Concepcion Pequeña, San Felipe, Cararayan asin an Calawag.
Sa presente mayo pa man naikurit na teknikal na problema alagad pigtitimpla man nin marhay kan mga empleyado tanganing magin smooth an registration.
Sa mga edad 15 – 17 anyos o mga new registrants magdara sana nin birthcertificate asin school id, mantang sa mga 18 pataas government id, siring man sa mga mawot mag pa re-activation o mga voters na nawara sa listahan magin an ma-transfer sa siyudad, asin correction of entry status gabos iyan pupwede iproseso sa opisina.
Pangapudan na sana kan opisyal sa mga mawot magparehistro bukas an opisina puon lunes hasta sabado alas 8 hasta alas 5 nin pagkahapon.
