NAGA CITY- an pasasalamat kan Philippine Red Cross- CamSur Chapter na dae nadanyaran nin labi an probinsiya kan Camarines Sur sa panlalamasa ni Bagyong Uwan.
Sa entrevista kan Bombo Radyo Naga ki Maria Felisa Badiola, Chapter Administrator, Philippine Red Cross- CamSur Chapter, sinaysay kaini na sulamenteng an nagin problema sana kan saindang lado orog na kan mga volunteers an pagkua nin impormasyon sa kasagsagan asin makalihis an bagyo.
Ini nin huli ta nagkaigwa naman nin interapsyon sa linya kan komunikasyon.
Alagad kun ikukumparar sa nakalihis na Bagyong Kristine, mas marhay soboot ngunyan an response kan mga tawo orog na ta nagpa-utob nin force evacuation.
Nalikayan an pagbungkaras kan mga darakulang problema o insidente sa panahon kan kalamidad.
Dugang pa kan opisyal, huli ta in place na an mga tawo nalikayan an sunod-sunod na apod kan mga residentes partikular an kaipuhan na i-rescue.
Mientrastanto, makalihis man an bagyo, tolos na nagpasiring sa ibang mga banwaan an Philippine Red Cross- CamSur Chapter siring kan Calabanga, Minlabac tanganing magtao nin hotmeals siringman an pagtangro nin mga serbisyo na kaipuhan kan mga tawo makalihis an kalamidad.
Sa ngunyan, pigsierto na sana ni Badiola na padagos an saindang ginigibong mga programa na makakatabang sa publiko orog na sa panahon kan sakuna.
