NAGA CITY-Padagos an pigsasagibong restoration kan Casureco II sa suplay nin mga kuryente.
Sa entrevista kan Bombo Radyo Naga ki Rinner Bucay- Spokesperson Casureco II, sinaysay kaini na kadakol pa an mga nagpapaabot sa sainda nin follow up manungod sa status kan mga kuryente sa saindang kanya-kayang mga Barangay asin Banwaan.
Sa presente, 100% energized in terms sa Brgys an bilog na syudad nin Naga, may mga nagkapira pa kayang Brgy an partially energized pa sana.
Sa banwaan nin Calabanga, 33 sa 48 Brgys an napailawan na. Sa Canaman, 18 sa 24 man na mga Brgy an naibalik nang suplay kan kuryente. 12 man sa 15 Brgys sa Magarao, Sa Milaor 100% na mga brgy an restored, alagad igwa pa nin mga babalikan kan saindang team siring man sa banwaan kan Pili.
Sigun ki Bucay, makamundo sana an parte kan banwaan nin Siruma huli ta tulo pa sana sa 22 na mga Brgy an na-energized.
Yaon soboot igde an challenge sa saidang koopertiba huli ta kaipuhan na matutukan an banwaan huli sa pagkakaigwa kaini nin halabang linya na nag aabot nin haros 38-45km, kaya mas dakol an talagang tatrabahuhon.
An mga construction asin maintenance team kan kooperatiba an ipapadara sa nasambitan ng banwaan oras na matapos sana an pagpapakarhay sa mga natatadang banwaan.
Mientrastanto, pigtawan duon kan opisyal na bako ng bago sa sainda an power restoration effort sa kada may kalamidad, hasta sa kaya pa, saindang pighihinguha na maibalik tulos an mga suplay nin kuryente.
Alagad mas kaipo kaya sa mga siring na sitwasyon, iyo an pagtatarabangan tangani mas mapadali asin maparikas an restoration effort na piggigbo kan saindang mga technical personnel.
Sa ngunyan, dakulang katabangan an mga kooperasyon kan ibang mga Brgy, na kun saen nagkukusa na mismo an mga ini na magsaayos kan mga naraot na mga wires asin pag-identify sa mga poste na kaipuhang maribayan.
Kabaliktaran ini sa ibang mga Brgy Officials na nag aasa na sana sa grupo kan saindnag kooperatiba na saro sa nakakapahaloy asin nakakapa-dipisil pag abot sa nasambitan ng power restoration effort kan Casureco II.
