Pigsierto ni Senate President Tito Sotto III na salbado an mga dokumento kan Senado makalihis an naikurit na kasulo sa Senate building kasuodma, Nobyembre 30, 2025.
Pigsierto ni Sotto na dae naapektaran kan kasulo an gabos kan importanteng dokumento kan Senado, kaibahan an mga kapot kan Blue Ribbon Committee.
Sinaysay ni Sotto, naireport an insidente sa Bureau of Fire Protection (BFP) bandang 6:30 a.am. asin an kalayo an nagpuon sa ika-tolong palapag, partikularmente na sa opisina kan Legislative Technical Affairs Bureau.
Tulos man na nagresponde an mga bumbero asin pigdeklarar na under control an kasulo pag-abot nin 7:43 nin aga.
Padagos man na pig-iimbestigaran kan mga otoridad an rason kan kasulo asin pig-assess an hewas kan danyos.
Huli sa paggamit nin tubig sa pag-apula kan kalayo, nagkaigwa nin tagas pababa sa Session Hall na gikan sa apektadong palapag.
Katuwang kan Senado an BFP asin internal security sa pagpapautob kan dugang na lakdang para sa kasalbaduhan kan establisyemento asin kan mga empleyado tanganing malikayan an parehas na insidente.
Sigun pa sa Senado, an maintenance team an matrabaho nin 24 oras tanganing mamara asin mapakarhay an Session Hall asin masierto na preparado ini para sa masunod na sesyon.
