Bukas an First Family na sumairarom sa lifestyle check.
Sinaysay ini ni Presidential Communications Office (PCO) Undersecretary asin Palace Press Officer Claire Castro sa sarong press briefing sa Malakanyang mantang pigsisimbagan an mga hapot na hinihimay sa sarong investigative report dapit sa distribusyon kan “allocable” infrastructure funds kun saen pigkokonsiderar na ‘top recipients’ an Ilocos Norte, balwarte kan pamilya Marcos, kun saen si presidential son Ferdinand Alexander “Sandro” Marcos an nagrerepresenta sa Kongreso.
Kinumpirmar man ni Castro na nabasa na ni Presidente Ferdinand R. Marcos Jr. an report kan Philippine Center for Investigative Journalism (PCIJ), nagsabing nakaresiber an distrito ni Sandro Marcos nin P15.8 billion sa Department of Public Works and Highways (DPWH) allocable funds gikan sa 2023 hasta 2025, pinakahalangkaw sa hanay kan 252 congressional districts.
Tiwala man an Presidente na maipapaliwanag kan saiyang aki an bagay na ini. Idinagdag pa ni Castro na preparado si Sandro Marcos na boluntaryong magpasiring sa Independent Commission for Infrastructure (ICI), nagkakapot kan imbestigasyon kan public infrastructure anomalies.
Sa report, sinuring marhay kan PCIJ report kun pano an P1.2 trillion na DPWH “allocable” funds an itinalaga asin naggagamit nin budgeting mechanism impormal na inaapod na “BBM Parametric Formula”.
An pormula an may darakulang pagkakaiba-iba sa hanay kan mga distrito, may nagkapira sa high-population areas an nakaresiber nin mas dikit kumparar sa mas sadit na distirto, asin may nagkapira man nin Duterte-aligned lawmakers an napabareta na nakaresiber nin zero allocables sa 2025 budget.
Asin kan haputon kun tutugutan kan Malakanyang na sumairarom sa lifestyle check an presidential son o an First Family, sinaysay ni Castro na “there is no objection” gikan sa Malakanyang.
