Naghagad si dating presidential spokesperson Harry Roque kan nakalihis na semana sa Interpol na dae iluwas an red notice kontra sa saiya, asin pighurot na ini an “protected bona fide asylum seeker” sa irarom kan ley kan Netherlands asin European Union.
Sigun ki Roque, an kaso kan qualified human trafficking kontra sa saiya an parte sana kan political retaliation kontra sa mga kaalyado kan pamilya Duterte asin kritiko ni Presidente Ferdinand Marcos Jr.
An kahagadan soboot kan gobyerno para sa red notice an nagbalgar sa Interpol Constitution, partikular sa Article 2 asin Article 3 na nagbabawal sa pakikiaram sa mga kasong “predominantly political in character.”
Huli digde, nagsumiter si Roque nin pormal na opposition sa Commission for the Control of Interpol’s Files tanganing sayumahan an kahagadan kan Pilipinas.
Kaibahan ini sa nagkapirang akusado, kaibahan si Cassandra Ong, na igwang warrant of arrest katakod sa Anti-Trafficking in Persons Act of 2003, huli sa soboot koneksiyon sa operasyon kan Philippine offshore gaming operator (POGO) asin scam hub na Lucky South 99 sa Porac, Pampanga.
Sigun sa DOJ, bako sanang abogado si Roque para sa sa Whirlwind Corporation, kundi nagsirbi man ining representative kan POGO sa nasambitan ng operasyon.
