Nagtao nin kusog buot sa mga kandidato asin kontratista an desisyon kan Commission on Elections (Comelec) Political Finance and Affairs Department (PFAD) na mayong paninimbagan si Sen. Francis “Chiz” Escudero sa P30-milyong campaign donation gikan sa sarong contractor.
An donor na si Lawrence Lubiano an may mga kumpanyang nagkaigwa nin kontrata sa Sorsogon, kun saen si Escudero an gobernador antes na magdalagan komo senador kan taong 2022.
Alagad sigun sa PFAD, suhay si Lubiano sa saiyang mga kumpanya, kaya man dae nagbalgar sa ley an donasyon. Sigun ki Danilo Arao kan Kontra Daya, nagpapadara ini nin salang mensahe na puwede pa man mag ako nin pondo gikan sa kontratista basta individual an deklarasyon.
Binanggit kaini na nagbabalgar ini sa obheto kan Statement of Contributions and Expenditures (SOCE) na siertuhon an fairness asin transparency sa halalan. Sinaysay ni Eric Jude Alvia kan NAMFREL na puwede ining mag-udyok sa mga kandidato na aktibong maghagad nin donasyon gikan sa taumbayan dawa na may potensyal na conflict of interest.
Binanggit man kaini na dapat surion kun igwa nin pansadiring interes an donor laban sa tungkulin kan kandidato. Sigun ki Luie Guia, dating Comelec Commissioner, dapat na hilingon kan ahensya kun an interpretasyon kan PFAD an nagtutugma sa obheto kan ley.
Mientrastanto, sinaysay ni Rey Bulay, Comelec Commissioner, na dae puwede mag-interpret nin key, kundi ipapautob sana an nakabugtak.
Pigtuyaw man kan mga legal experts asin politiko siring ninda Ryan Jay Roset (LENTE) asin Leila De Lima an desisyon, huli ta pwede man na manimbag an maysadiri kan kumpanya dawa na individual an donation, gamit an prinsipyo kan “piercing the corporate veil.”
Sigun ki Arao, dapat ipahiling kan Comelec an bilog na SOCE asin annexes tangani maaraman kan publiko an kabilugang datos sa donasyon.
Nangapudan man ini na dapat i-update kan real-time an SOCE online tangani malikayan an pagbalgar sa ley asin ma-monitor an spending limit per voter.
Nagtao man nin suhestiyon si Arao na tustusan kan gobyerno an gastos sa kampanya tangani pantay an mga kandidato asin malikyan an pagdepende sa contractor-donors.
Mientrastanto, mawot ni Alvia na pahewason an coverage kan SOCE hasta sa sarong taon antes na magpuon an opisyal na kandidatura tangani dae maitago an mga transaksyon sa kampanya. Ngunya, nasa Comelec en banc na an kaso ni Escudero asin nilalaoman an pinal na desisyon.
Pigkahadit kan mga eksperto na an desisyon kan PFAD an pwedeng magin precedent para sa masunod na mga halalan, kun saen an mga mayayamang donor asin kontratista an pwedeng magkaigwa nin impluwensya sa mga kandidato.
