NAGA CITY- Mas mabenta soboot ngunyan an paputok sa may parte kan riverside sakop kan Naga City People’s Mall kasabay kan pagsabat kan Bagong taon.
Sa entrevista kan Bombo Naga ki Daisy Santa Rosa, Firecracker vendor, sinaysay kaini na haros parehas sana man an presyo kan mga paputok kan nakalihis na taon apwera sa nagkapirang klase na nahilingan nin kadikit na pag-umento.
Sigun ki Santa Rosa, mabenta an mga pailaw asin an mga paputok na pwede sa mga aki.
Kadalasan an mga ini an an nagkakantedad nin puon P50 depende sa klase.
Mientrastanto, pig-asegurar man ni Santa Rosa na padagos an saindang pagsunod sa guidelines dapit sa mga pwede sanang ipabakal na klase kan paputok tanganing makusunod sa mga panundon na pigtalag kan mga otoridad asin kan lokal na gobierno kan siyudad nin Naga.
Pigsaysay pa kaini na uru-aldaw an inspection kan BFP, PNP sa saindang pwesto tanganing masierto an nagsusunod an gabos.
Sa ngunyan, pig-enkaminar na sana kaini an publiko na magin maingat sa paggamit kan nasambitan ng mga paputok tanganing malikayan an mga untowards incidents ngunyan na bagong taon.
