Piglinaw ni House Majority Leader asin Ilocos Norte Rep. Sandro Marcos na mayo ining pigsi single out o pigpupuntirya sa pagsusunad kan House Bill 7432 o prosopwestong “No Work, No Pay” sa mga miyembro kan Kongreso.
Kasimbagan ini ni Rep. Marcos kan haputon kun target kan saiyang prosopwesto si Senator Ronald “Bato” dela Rosa na pirang bulan nang dae naglalaog sa Senado makalihis na magkuriyat an bareta na igwang arrest warrant na saiya an International Criminal Court (ICC).
Paliwanag ni Marcos an saiyang prosopwestong ley an tamang lakdang tanganing masierto na matibay an batas na maipapasar kan Kongreso para sa namamanwaang Pilipino.
Pigpunto pa ni Marcos na dae soboot mapahimutikan na igwang mga lehislador sa Kamara asin Senado an para-absent dae nagpapartisipar sa mga committee hearings o debate sa plenaryo.
