Inihayag ni Senate President Vicente “Tito” Sotto na dapat ikonsiderar ni Sen. Ronald “Bato” Dela Rosa na “no work, no pay” scheme o dae pagresebir sa saiyang sweldo hasta sa oras na makabweltara ini asin preparado nang magpahiling sa senado.
Paliwanag ni Sotto, haloy na man soboot kan huring maka-atendir sa mga sesyon asin makalaog sa saiyang mga komite an senador dara an posibilidad na pagluluwas kan International Criminal Court (ICC) nin warrant of arrest kontra sa saiya.
Sigun ki Sotto, sana ikonsiderar ni Dela Rosa an saiyang suhestiyon tanganing mawara na man an soboot “pressure” sa opisina kaini dara kan sunod-sunod na pag-absent.
Sa ibong kaini, alagad maski dae na nahihiling an presensiya ni Dela Rosa sa halangkaw na kapulungan, padagos man soboot sa pagtrabaho an saiyang opisina na nakapagsumiter nin bills, resolution asin recommendations sa mga ongoing na mga pagdangog.
Mientrastanto, dae na man soboot ipagtataka kan Senate President an posibilidad na mag-file nin sarong ethics complaint kontra ki Dela Rosa huli na man sa dae kaini pagsipot asin paglaog sa saiyang opisina.
