Mas pinahigot pa kan Philippine National Police (PNP) an saindang pakikipag-koordinar sa iba pang mga ahensiya sa ibang nasyon tanganing matunton an lokasyon kan puganteng businessman asin soboot mastermind sa missing sabungeros case na si Charlie “Atong” Ang.
Sigun ki PNP Chief PGen. Jose Melencio Nartatez Jr., obheto kaini na mahadlangan pa an mga hiro asin mga masunod na lakdang ni Ang makalihis na mapabareta na mayo ini sa Cambodia, taliwas sa mga naenot nang pahayag kan Department of Interior and Local Government (DILG).
Mientrastanto, nagtitinir na masigsaig an Pambansang Pulisya asin an iba pang mga katuwang na law enforcement agencies na magsagibo asin ipagpadagos an manhunt operations kontra ki Ang asin magin sa mga kapwa kaini pugante.
Naenot nang sinaysay ni DILG Sec. Jonvic Remulla sa sarong entrevista na mas dakula pa man an posibilidad na nasa nasyon pa si Ang asin dae pa nakakaluwas nin Pilipinas.
Mas pinakusog man an pagpapautob kan seguridad sa mga pantalan, palupadan magin sa backdoors kan nasyon tanganing masierto na dae makakapuslit an puganteng business tycoon pasiring sa ibang nasyon.
