IGWA pa man giraray nin halong pulitika an nagin pagbisita ni Pres. Ferdinand Bongbong Marcos Jr. sa Naga City kan nakalihis na Pebrero 21, 2026.
Sa nagin entrevista kan Bombo Radyo Naga ki Jen Nagrampa, Chairperson kan Bicolana Gabriela, dae man soboot masasayumahan na dakula an maitatabang kan nagin pagbisita ni PBBM sa syudad orog na sa pagresolbar sa mga huma sa pagbaha sa nasambitan ng lugar.
Alagad sigun ki Nagrampa, dae malabong isipon kan ibang mga tawo na igwa pa man giraray nin halong kolor nin pulitika an pagbisitang ini kan presidente.
Nin huli ta kun marurumduman, dating magkalaban sa pagka-bise presidente kan nakalihis na 2016 asin sa presidential elections kan 2022 an duwang opisyal, alagad ngunyan united na asin nagkakasundo.
Dagdag pa kan opisyal, kaipuhan na magin maingat asin magin matalino an lambang mga Pilipino asin dae soboot basang basang na magtubod sa kun ano an pinapahiling kan sarong politiko.
Kundi aramon kun makakamarhay ini sa bilog na nasyon o lokalidad. Sa ibong na lado, nin huli ta harani na an pagkomemorar kan EDSA People Power Revolution sa maabot na Pebrero 25, 2026, may mga isasagibo an saindang organisasyon na mga paghiro siring kan peaceful rally o ano pa man na mga pagtiripon komo pagsisiwalat kan saindang pangapudan asin agrangay sa gobyerno.
