Naipasa ng House of Representatives sa third reading ang 18 sa 52 prayoridad na panukalang batas ng LEDAC bago magsimula ang Lenten break, ayon kay House Majority Leader Sandro Marcos nitong Linggo, Marso 22.
Ayon kay Marcos, nakatuon ang mga panukalang batas sa reporma sa ekonomiya, pampublikong serbisyo, edukasyon, pamamahala, at social protection. “Masigasig ang Kamara sa pagtutok sa mga prayoridad ng administrasyon, at ipinagmamalaki namin ang aming nagawa,” dagdag niya.
Kabilang sa mga pangunahing measure ang BARMM election reset, National Center for Geriatric Health, EPIRA Amendments, Waste-to-Energy Act, Blue Economy Act, Travel Tax Abolition, at Digital Payments Act.
Pinuri ni Marcos si House Speaker Faustino “Bojie” Dy III sa pagpapanatili ng focus ng Kamara sa legislative work, lalo na sa kasalukuyang krisis sa Middle East. Binanggit niya ang kahalagahan ng panukala na naglalayong magbigay ng agarang lunas sa mataas na presyo ng gasolina at iba pang pangunahing bilihin sa pamamagitan ng pansamantalang suspensyon o pagbaba ng excise tax sa petroleum products.
Batay sa tala ng Kamara, mula Hulyo 28, 2025 hanggang Marso 18, 2026, may 8,705 House bills at 927 resolutions na na-file, kabilang ang 905 House resolutions, 5 joint resolutions, 13 concurrent resolutions, at 4 resolutions ng parehong Houses. Kabuuang 9,632 measures at 233 committee reports ang naisumite, na nagpapakita ng tuloy-tuloy na progreso ng Kamara kahit sa masikip na schedule.
Magpapatuloy ang First Regular Session ng 20th Congress hanggang Hunyo 5.
