Target kan Department of Education (DepEd) na ma-promote an 100,000 na paratukdo asin school heads bago matapos an ngunyan na taon, bilang parte kan pinahiwas na suporta asin reporma sa sektor nin edukasyon kan nasyon.
Ini an pig-anunsyo kan departamento bilang katapusan kan School Year 2025-2026 asin an opisyal na pagpoon kan sarong bulan na bakasyon kan mga paratukdo kan Abril 1.
Segun sa DepEd, mareyalisar an nasabing target sa irarom kan Expanded Career Progression System, na obhetong matawan nin mas malinaw asin mas marikas na proseso nin promosyon an mga edukador.
An lakdang na ini resulta kan sunod-sunod na nasyonal na konsultasyon asin pagbisita sa mga eskwelahan. Apwera sa promosyon, pigsierto man kan ahensya na magian an pagabat kan mga paratukdo sa laog kan classroom. Kabali sa mga reporma na pig-implementar dai pa sana nahahaloy iyo an rebisyon kan mga guidelines sa pag-obserbar sa classroom, distribusyon kan overtime asin overload pay, asin an lubos na pagbawas kan administrative workload.
Padagos man an pagdistribwir kan gobyerno nin mga laptops asin iba pang learning resources.
Inomaw ni Education Secretary Sonny Angara an sakripisyo kan mga paratukdo sa padagos na paghulma kan mga jovenes sa ibong kan angat sa sektor.
Mientrastanto, pigkokonsiderar man kan DepEd an pambihirang naginibohan kan mga estudyante ngunyan na taon bilang patunay kan nag-oorog na kalidad kan edukasyon.
