Nag-asegurar si Naga City Mayor Leni Robredo na mayo siyang plano na magdalagan bilang presidente sa 2028 elections, sa tahaw kan lakop na espekulasyon dapit sa posibleng pagbalik kaini sa National Politics.
Sa intrevista kan Bombo Radyo Naga ki Naga City Mayor Leni Robredo, malinaw sa saiyang paninindugan na nakatutok siya sa saiyang presenteng trabaho sa ciudad asin sa pagpapadagos kan mga lokal na programa asin proyekto.
Sa saiyang pahayag, piglinaw man ni Robredo na dai ini nag-aandam nin anuman na kandidatura para sa pagkapresidente, asin mas gusto niyang itutok an saiyang panahon asin atensyon sa serbisyo publiko sa lokal na lebel.
Mientrastanto, nagpapadagos an debate kan publiko manungod sa saiyang papel sa maabot na National Election, alagad an kampo kan alkalde nag-iinsistir na mayo pang lakdang o plano para sa 2028 presidential race.
