Kinumpirma ng Pre-Trial Chamber I ng International Criminal Court (ICC) ang mga kaso laban kay dating Pangulong Rodrigo Duterte at inihayag na kinakailangan ang kanyang personal na presensya sa nalalapit na paglilitis ng kasong crimes against humanity.
Ayon sa ICC, nakasaad sa Rome Statute na bumuo sa korte ang obligasyon ng presensya ng akusado sa panahon ng paglilitis. Dahil dito, inaasahang personal na haharap si Duterte sa Trial Chamber kaugnay ng mga paratang na may kinalaman sa mga pagpatay sa ilalim ng kanyang administrasyon.
Si Rodrigo Duterte ay kasalukuyang nasa kustodiya ng International Criminal Court mula Marso 2025. Una siyang humarap sa Pre-Trial Chamber I noong parehong buwan, ngunit hindi na sumali sa mga sumunod na pagdinig, kabilang ang mga pagdinig kaugnay ng kumpirmasyon ng mga kaso noong Pebrero.
Sa ilalim ng Rome Statute, maaari lamang alisin sa courtroom ang akusado sa mga “eksepsiyonal na pagkakataon,” at dapat ay may alternatibong paraan upang masundan pa rin niya ang paglilitis at makausap ang kanyang abogado gamit ang teknolohiya.
Kaugnay ito ng kasong crimes against humanity na may kinalaman sa tinatayang mahigit 6,000 pagkamatay sa kampanya kontra droga. May 539 biktima rin ang pinayagang lumahok sa kaso at kinakatawan ng mga abogadong Pilipino at mula sa ICC Office of Public Counsel for Victims.
Sinabi rin ng ICC na magpupulong ang Trial Chamber para itakda ang pagsisimula ng paglilitis at iba pang proseso, kabilang ang pagpapalitan ng ebidensya at iba pang preliminary matters. Maaari ring humiling ng pansamantalang paglaya si Duterte, ngunit ang desisyon ay nakasalalay pa rin sa mga hukom ng ICC.
