Posibleng mahigit kalahati ng mga miyembro ng House of Representatives of the Philippines ang boboto pabor sa impeachment ni Vice President Sara Duterte, ayon kay House Deputy Speaker Janette Garin.
Ayon kay Garin, kung mangyayari ito ay lalampas sa kinakailangang 106 boto upang maipasa ang impeachment complaint sa Senado para sa paglilitis.
Sinabi rin niya na sa ilalim ng Lakas–CMD, na may mahigit 80 miyembro sa Kamara, posibleng dalawang-katlo ang susuporta sa impeachment batay sa mga ebidensyang inilatag sa mga pagdinig.
Gayunman, aminado si Garin na may ilang mambabatas na maaaring maimpluwensiyahan ng pulitika at sitwasyon sa kanilang mga distrito, lalo na sa Mindanao.
Binigyang-diin din niya na walang magiging iisang party stand ang Lakas–CMD at hahayaan ang mga miyembro nito na bumoto ayon sa kanilang konsensya.
Samantala, inaasahan naman ni Terry Ridon ng Bicol Saro Party-list na mahigit kalahati rin ng party-list representatives ang susuporta sa impeachment complaint.
Sa kabilang banda, iginiit ni Paolo Duterte na hindi dapat maimpluwensiyahan ng pressure ang boto ng mga mambabatas, kasabay ng alegasyon na ginagamit umano ang budget at Statements of Assets, Liabilities and Net Worth (SALNs) upang impluwensiyahan ang kanilang desisyon.
Pinabulaanan naman ito ng ilang kongresista at hinamon ang kampo ng bise presidente na humarap sa deliberasyon sa Kamara.
Patuloy namang inaasahan ng House Committee on Justice ang pagtatapos ng committee report at articles of impeachment bago ito isumite sa plenaryo, habang nakatakdang bumoto ang Kamara sa darating na Mayo 11.
