Kinumpirmar ni Interior Secretary Jonvic Remulla na may ipapaluwas na subpoena para ki Senador Ronald “Bato” dela Rosa saaga, Mayo 11.
Sa sarong press conference, pigklaro ni Remulla na bako ining mandamiento de aresto kundi parte sana kan imbestigasyon sa nagkapirang reklamo laban ki dela Rosa huli sa suboot extrajudicial killings sa war on drugs panahon kan administrasyon ni Duterte.
Dugang pa kan sekretaryo, mayo pa siyang nahihiling na kopya kan International Criminal Court (ICC) arrest warrant kontra sa dating senador.
Enot nang piglinaw kan ICC na mayo pa sindang pigpapaluwas na public arrest warrant ki dela Rosa.
Katakod kaini, pig-anunsyo ni Remulla na dae na ipapadagos kan Department of Interior and Local Government (DILG) an pag-deploy nin 10,000-man task force tanganing hanapon an senador. Sa ibong kaini, padagos suboot na hahanapon kan Philippine National Police-Criminal Investigation and Detection Group (PNP-CIDG) si dela Rosa para sa subpoena.
Marurumdoman na dae na liwat nakalaog sa senado si dela Rosa asin nagluwas sa publiko kan Nobyembre kan nakalihis na taon makalihis an mga bareta na nagpaluwas na nin mandamiento de aresto an ICC huli sa suboot pagkaimbwelto sa war on drugs ni dating Presidente Rodrigo Duterte.
Igwa man nin pending na reklamo kontra sa senador sa Senate Committee on Ethics huli sa halawig na pag-absent kaini sa mga sesyon kan Senado alagad nareresibe pa man giraray an saiyang sweldo.
