Nagkapirang mga legal analyst asin political observers an nangapodan na magsuko na sa mga awtoridad si Senator Ronald “Bato” dela Rosa dapit sa existing warrant of arrest kontra saiya, imbes na soboot magtago asin maglikay sa legal na proseso.
Sa entrevista kan Bombo Radyo Naga ki Atty. Jojo Lacanilao (Convenor, Duterte Panagutin Network), sinabi kaini na dae pa nagpaluwas nin Temporary Restraining Order (TRO) an Korte Suprema ngani na maibitaran an pag-eksekutar kan warrant of arrest, kun kaya nagdadanay na legal asin balido an anuman na aksyon kan mga law enforcement agencies para arestaron an senador.
Nanindugan si Lacanilao na an pagsangat nin petisyon sa Korte Suprema dae automatic na nangangahulugan na kaipuhan nang pugulan an implementasyon kan mandamiento. Saiyang ipinaliwanag na, “Kapag walang TRO, may obligasyon ang executive branch na ipatupad ang warrant of arrest,”.
Piglalaoman na masasabutan kan dating hepe kan Philippine National Police (PNP), Dela Rosa an kahalagahan kan pagsunod sa legal na proseso.
Mientrastanto, pigkwestyon man kan nagkapirang sektor an lakdang kan Senado na tawan si Dela Rosa nin “protective custody” sa laog kan Senado. An kritiko nagsasabi na mayo nin malinaw na legal na basehan para sa siring na lakdang, orog na kun igwa nin eksistidong mandamiento de aresto.
