Labing 5,000 na bakanteng trabaho an pig-opresir sa sarong job fair na inatenderan kan 30 lokal na kompanya tanganing matawan nin oportunidad an mga naghahanap nin trabaho sa rehiyon.
Sa intrevista kan Bombo Radyo Naga ki Ella E. Verano, Provincial Director – DOLE CAM SUR, sinabi kaini na kabali sa mga mayor na employer an Philippine Army na igwang sobra sa 3,000 na bakanteng posisyon, siring man an mga kumpanya gikan sa mga sektor nin wholesale, retail, agri-business, asin lending corporations.
Tanganing mapadali an proseso kan aplikasyon, sarong One-Stop Shop man an pigbugtak sa lokasyon kun saen an mga aplikante makakakua nin kinakaipuhan na mga dokumento asin serbisyo. Kabali sa mga nagpartisipar na ahensya iyo an SSS, PhilHealth, Pag-IBIG Fund, PSA, asin PhilSys tanganing matabangan lalo na an mga first time job seekers sa saindang pre-employment requirements.
Segun ki Verano, padagos na pig-iimplementar an mga programa sa trabaho sa ibong kan mga angat na dara kan krisis sa enerhiya asin paglangkaw kan presyo kan lana. Parte kaini an serye nin mga job fair sa manlaen-laen na lugar arog kan Legazpi, Iriga, Pili, asin Goa para matabangan an mga nawaran nin trabaho asin ipabisto sa mga kumpanya na may mga bakanteng posisyon.
Mientrastanto, pig-anunsyo man na malangkaw an minimum wage sa rehiyon hale sa ₱455 kada aldaw pasiring sa ₱480 kada aldaw poon Disyembre 1. An dagdag na ₱25 na pagtaas inaprobaran kan Regional Tripartite Wages and Productivity Board (RTWPB) makalihis an konsultasyon sa manlaen-laen na sektor kabali na an labor, management, DTINE asin DTINE.
Inaabisuhan an mga aplikante na dai makaatender sa job fair na magbisita sa Facebook page kan Metro PESO Naga para sa listahan kan mga bukas na trabaho. Inenkaminar man sinda na magsumiter nin mga resume asin portfolio sa paagi nin email asin mag-andam para sa mga interbyu tanganing dagdagan an saindang tsansa na makua.
