Nagkundusir nin funeral prayer an tolong aki kan nagadan na dating lider kan Iran na si Ayatollah Ali Khamenei, mantang rinibo na mga tawo asin mga halangkaw na opisyal an nag-atinder sa funeral ceremony sa Tehran, Iran.
Nag-atinder man sina Mostafa, Meysam, asin Masoud Khamenei, na nagpangadyo sa atubangan kan kabaong kan saindang ama sa dakulang religious complex sa Tehran. Kapansin-pansin an dai pag-atender kan saro pang aki ni Ayatollah Ali na si Mojtaba Khamenei, na kinokunsiderar komo posibleng magsunod na Supreme Leader kan Iran.
Marurumduman na nagadan si Ayatollah Ali Khamenei kaiba an nagkapirang miyembro kan saiyang pamilya pagkatapos kan pambobomba na piglansar kan Estados Unidos asin Israel kan Pebrero 28. Ini an nagin rason kan pag-abot nin nagkapirang semanang giyera sa rehiyon antes nag-kaigwa nin pansamantalang ceasefire.
Sa seremonya, inilatag man an mga kabaong kan iba pang nagadan na kapamilya kan dating Supreme Leader, kabali an saiyang aki na babayi, manugang, asin saro niyang apo na 14-buwang an edad.
Presente sa funeral ceremony an mga halangkaw na opisyal kan Iran, kabali sina Iranian President Masoud Pezeshkian asin Parliament Speaker Mohammad Baqer Qalibaf.
Bilang kabali kan pagluluksa kan nasyon, nagdaos an Iran nin sarong semanang funeral procession para sa dating lider asin saiyang pamilya,asin an pagdala kan saiyang bangkay sa nagkapirang sagradong lugar kan mga Shi’ite sa Iraq.
Mientrastanto, sagkod hasta ngunyan dai pa nagpapahiling sa publiko si Mojtaba Khamenei, na suboot nalugadan sa pag-atake kan U.S. asin Israel kan mga naglipas na bulan. May mga espekulasyon na grabe an saiyang kondisyon, alagad sagkod ngunyan mayu pang opisyal na kompirmasyon an Iran.
