Pigtawan-duon kan eksperto sa International Law na mayu nin legal na epekto sa isyu kan soberenya kun aapodon na West Philippine Sea o South China Sea an kadagatan, huli sa an pangaran mismo bako nin basehan kan pag-angkin nin teritoryo.
Sa intrevista kan Bombo Radyo Naga kay Atty. Ronald D. Pancipane Lawyer, sinabi kan abogado na an South China Sea iyo an internasyonal na pangaran kan kadagatan na gikan pa sa panahon kan mga Europeo, habang an West Philippine Sea naman an opisyal na tawag kan gobyerno kan Pilipinas sa parte kan South China Sea na sakop kan hurisdiksyon asin claim kan bansa, base sa Executive Order na ipinagluwas kan administrasyon ni dating Pangulong Benigno Aquino III.
Segun sa abogado, dai nangangahulugan na kun gamiton an pangaran na South China Sea, inaako na kan Pilipinas na pag-aari ini kan China.
Mantang dapit sa mga lumuluwas na ulat manungod sa sinasabing pag-angkon kan China sa Batanes, sinabi kan eksperto na wara pa nin malinaw asin opisyal na pahayag hale mismo sa gobyerno kan China, kaya dai pa ini dapat ikonsiderar na opisyal na isyu sa ngunyan.
Ipinaliwanag man kaini na an mga isla sa Batanes asin an kadagatan sa palibot kaini sakop kan archipelagic waters kan Pilipinas, na nasa idalom kan soberenya kan estado, asin mas mataas an legal na katayuan kisa sa Exclusive Economic Zone (EEZ).
Dugang pa niya, magkaiba an konsepto kan sovereignty asin sovereign rights. An sovereignty nagtatao kan bug-os na awtoridad kan estado sa teritoryo, samantalang an sovereign rights sa EEZ nakatuon sana sa eksklusibong karapatan sa paggamit asin pagmina kan mga natural na yaman.
May kinaaraman naman sa Nine-Dash Line, sinabi kan abogado na unilateral sana ini na posisyon kan China asin mayu nin nahihiling na basihan sa internasyonal na pag angkin, partikular sa United Nations Convention on the Law of the Sea (UNCLOS).
Kun sakaling magluwas nin opisyal na pahayag an China na inaangkin an Batanes, sinabi kan eksperto na an pinakaenot na gibuhon kan gobyerno kan Pilipinas iyo an pagsumite nin pormal na diplomatic protest.
