Panahon na suboot na patunayan kan Legal Team ni Vice President Sara Duterte na tunay na igwa nin banta sa buhay kan Bise Presidente, kaya nangyari an saiyang mga pagbabanta laban ki President Ferdinand Marcos Jr. asin sa iba pa.
Segun sa Human Rights Lawyer na si Atty. VJ Topacio, pirming ini-insistir kan kampo ni Duterte na igwa siyang banta sa buhay, arog kan saindang idinahilan sa kontrobersiyal na Zoom Press Conference kan Nobyembre 23, 2024.
Kabali man digdi an suboot Project Romanov, kun sain ipinapahiling kan kampo ni Duterte na igwa man nin banta sa buhay kan saiyang mga kapamilya.
Maski iba an orihinal na konteksto kan Project Romanov na inot na binanggit ni Mayor Baste Duterte, garo ginagamit ini kan kampo ni VP Sara tanganing patibayon an saindang pahayag na malawak an banta sa saiyang buhay.
Huli digdi, panahon na suboot na patunayan ini kan saiyang kampo sa masunod na semana, kun sain nakatakdang talakayon an mga huring parte kan Grave Threat Article.
Kun totoo man an alegasyon, importante suboot na maimbestigaran ini kan mga awtoridad sa Pilipinas sa paagi kan mga Law Enforcement agencies.
Mientrastanto, nagtutubod si Atty. Topacio na gusto kan prosecution na mas patibayon an saindang alegasyon na an mga pagbabanta ni VP Sara, sarong “pattern” na kan saiyang ugali, kaya plano nindang ipresentar pa si National Bureau of Investigation Director Melvin Matibag sa huring parte kan trial days na nakalaan sa pagtalakay kan Threat article.
Segun pa sa abogado, an naturang pattern dai na mabubura kan kampo ni VP Sara Duterte, maski piriton pa kan saiyang PR team na linigon an saiyang imahe.
